الابيسون

بنشغل  الاوبيسون او البيتي بوان بخيوط اسمها dmc منها الصوف خاص بالاوبيسون ومنها المولينيه خاص بالبيتي بوان الصوره اللي فوق هي دي خيوط ال dmcالمولينيه 

طبعا بتختاري اي رسمه ممكن لو عندك طابعه تطبعي الرسمه دي وعلي فكره معظم شغل السوق الاباجوره بتكون عباره عن فرع ورد مثلا او فرع شجره واحد ودا طبعا بيقلل من قيمه الشغل جمال الاباجوره انها تكون مليانه شغل 

بتجهزي للوجه الواحد من الاباجوره قماش 30 ×37 سنتيمتر وكبدايه ممكن تعملي وجه واحد ولو حبيتي بتكرري نفس الخطوات ل 4 وجوه

بتتني حروف الشغل عشان مش ينسل منك بغرزه السراجه العاديه وبخيط عادي
بتحطي الرسمه بتاعتك تحت القماش في النص بالظبط وطبعا هيكون في قماش حوالي 3سنتيمتر او 4 زياده من كل الاتجاهات لان الزياده دي بتاع الاباجورات هيستخدمها لظبط الشابوه وهو بيشده احنا عاملين حسابنا في المقاسات اللي فوق للزياده دي وتسبتي القماش في الرسمه بدبابيس كويس جدا وحطي دبوس في النص لزياده التثبيت

دي الصوره توضح اتجاه الغرزه وطبعاالشرح بالتفصيل علي الاباجوره

دايما خلي بالك ان الغرزه بتكون اتجاهها من الشمال لليمين

 دي الابره بتكون فتحه الخيط واسعه شويه وسنها مش مدبب اكيد كلكوا عارفينها ابره كنفاه عاديه

دا الخيط هو مكون من 6فتلات الشغل التجاري بيشتغلوه ب 4 فتلات لكن الصح هو نشتغل بالفتله كامله

 بنعمل عقده صغيره في طرف واحد من الخيط 

نبدا بالشرح علي الاباجوره الجزء اللي حددته بالالوان دا هو اللي هنبدأ الشغل فيه

حددت بالاسهم الجزء اللي هنشتغله هنبدأ من اول سطر في الرسمه هنسحب الخيط لاول غرزه

دلوقت الخيط في اول غرزه بندخل الابره في الغرزه رقم 2 ونطلع من رقم 3

اخدنا الخيط من رقم 1الي 2وخرجنا الابره من رقم3

كده اشتغلنا اول سطر حسب حدود الرسمه وعاوزين نشتغل السطر التاني فهندخل الابره في اخر غرزه في الرسمه اللي هي رقم 14 وهنسحبها لظهر الشغل

هنقلب اتجاه الرسمه وهنبدأ نشتغل تاني بنفس الطريقه من الشمال لليمين

لاحظي اني بطرز علي حدود الرسمه بتاعتي

قلبت تاني الرسمه عشان ابدأ السطر الخامس

واستمريت بنفس الطريقه وكده اول فرع في شغل الاباجوره خلص وبنتبع نفس الطريقه في كل اجزائها

نبدأ  نوزع الوان الخيوط علي الشغل طبعا طالما انتي اللي هتشتغلي فممكن تكوني الوانك اللي انتي محتاجاها حسب المكان اللي هتحطي فيه الاباجوره او التابلوه 

نيجي بئا لمرحله تانيه مهمه جدا وهي غسيل الاباجوره الهدف منه ان الفتحات اللي في نسيج القماش بتضيق جدا فبتكون احلي بكتير وهوريهالكوا الصوره الجايه وبتتغسل بميه سخنه جدا مش تخافي لا الوان الخيط ولا القماش هيجراله حاجه وعشان كده لااااازم الخيط والقماش فرنساوي زي ماقلت في الاول

لاحظي الفرق في فتحات النسيج قبل وبعد الغسيل

ودى طريقه تقفيل الشغل

تقفيل الغرزه من الضهر ودي مهمه جدا عشان الغرز مش تفك منك مع شد التابلوه او الاباجوره وطبعا التقفيل اهم في الكراسي لانها بتتنجد وبتستعمل فلو مش قافله غرزك مظبوط ممكن تفك

من الضهر طبعا بتدخلي الابره في اخر غرزه اشتغلتيها

بتشدي الخيط كويس

بتسحبي الخيط شويه وبتخلي جزء منه زي الصوره

بتعدي الابره من بين الخيط

بتكوني كده عملتي عقده واتاكدي انك شدتيها كويس

دخلي الابره تحت عدد من الغرز يعني مش اقل من 5 او6غرز واسحبي الخيط

هنا سحبت الخيط من تحت الغرز وبكده مستحيل اي غرزه تفك معاكي

 منقول وجزاها الله خيرا الاخت هدى صاحبة الموضوع